STUÐNINGUR VIÐ UNGT FÓLK SEM VELUR ÓHEFÐBUNDNA LEIÐ Í VALI Á STARFSTENGDU NÁMI

NOREGUR, ÍSLAND, ÁLAND, FINNLAND, SVÍÞJÓÐ

Mikið er lagt upp úr því að hvetja ungt fólk til að þora að brjóta hefðbundin kynjaviðmið í vali sínu á námi, en hvernig er best að styðja við nemendur þegar þeir hafa gert upp hug sinn? Þetta var í brennidepli verkefnisins „Jafnrétti í starfstengdu námi á Norðurlöndum“ sem Norræni jafnréttissjóðurinn fjármagnaði árið 2018.

- Það er ekki nóg að tala um að við viljum fleiri karlmenn inn í skólana eða að fara af stað með verkefni sem á að vekja áhuga stúlkna á tækni. Ef nemendum líður svo ekki vel á vinnustað þá halda þeir ekki áfram á þeim vettvangi, segir Gunilla Rooke, menntaráðgjafi hjá sænska menntamálaráðinu og einn af umsjónarmönnum verkefnisins.

Verkefnið var samstarfsverkefni aðila  í Finnlandi, Íslandi, Noregi, Svíþjóð og á Álandseyjum. Markmiðið var að fá mynd af því hvaða stuðning nemendur fá í vinnustaðanáminu, þ.e.a.s. starfsþjálfuninni, og hverjar þarfir leiðbeinenda og starfsfólks skólans eru, en þau bera ábyrgð á því að veita nemendum stuðning.

Gunilla Rooke tekur fram að margir vinnustaðir einkennist af úreltum viðmiðum og að margir nemendur fái áfall við sín fyrstu kynni af atvinnulífinu.

- Þetta eru til dæmis stúlkur sem koma á byggingarsvæði þar sem ekki eru búningsklefar fyrir þær, eða þar sem búningsklefarnir eru fullir af myndum af nöktum stelpum. Þetta eru strákar sem eru að hefja störf við umönnun eða í leikskóla en mæta menningu sem gerir þá tortryggilega eða lokar þá úti.

Öll Norðurlöndin sem tóku þátt í verkefninu standa frammi fyrir svipuðum áskorunum, staðhæfir hún.

- Í gegnum tíðina hefur mjög lítið verið talað um kerfislæg vandamál sem skapa hindranir í menntun og atvinnulífi. Ég er hissa á þessu, segir hún.

Gunilla Rooke telur að verkefni þeirra hafi stuðlað að því að fleiri hafi áttað sig á þeim jafnréttisáskorunum sem eru til staðar í tengslum við starfstengt nám. Hún álítur einnig að verkefnið hafi styrkt tengslin milli þeirra samtaka sem tóku þátt og rutt brautina fyrir áframhaldandi samstarf.

- Norðurlöndin búa við svipað menntakerfi, þannig að við höfum góð tækifæri til að styðja hvert við annað og vera samferða fram á veginn, segir hún.

Á meðan á starfsnámsverkefninu stóð var meðal annars skipulögð norræn ráðstefna í Stokkhólmi með þátttakendum frá bæði skólum og ýmsum fyrirtækjasamtökum. Í kjölfar verkefnisins hefur einnig verið unnið að nýjum fræðsluátökum sem hafa það að markmiði að efla jafnréttishæfni þeirra sem hafa það hlutverk að styðja við nemendur í starfsnámi. Þar með telur Gunilla Rooke að þeir sem hafa það hlutverk að leiðbeina nemendum út á vinnustað séu orðnir betur í stakk búnir til þess.

- Verkefnið hjálpaði okkur að sjá hvers konar aðgerðir við þurfum að fara í tengslum við vinnustaðanám, segir hún.

Hún áttar sig á að mikið verk sé óunnið þegar kemur að því að bæta stuðning við nemendur sem velja nám sem fellur utan normsins.

- Ef við höfum vilja til þess að sinna þessum nemendum verðum við að verða betri í að styðja við þá þannig að þeir öðlist styrk til að fylgja eftir vali sínu. Þetta er áskorun bæði fyrir atvinnugreinar og skóla, segir hún.