Fororð hjá samstarvsráðharrunum
Heimurin hevur tørv á fleiri norðurlendskum virðum – ikki færri. Tí Norðurlond hava nakað serligt at bjóða. Vit vilja brúka formansskapin til at samansjóða øll átta Norðurlond enn meira og seta kós móti visjónini hjá stjórnarleiðarunum: at Norðurlond skulu vera heimsins mest integreraða og burðardygga landaøki í 2030.
Tað fara vit at gera við at arbeiða við ítøkiligum politiskum økjum og við at leggja serligan dent á at styrkja fólksliga norðurlendska samstarvið í sivilsamfelagnum. Norðurlond eru fyrst og fremst fólkið, sum her býr.
Norðurlond eru sameind á nógvum økjum – við sínum máli, fólkaræði, samfelagsbygnaði, undirstøðukervi, ríka mentanararvi og sterka sivilsamfelag. Alt hetta kann koma undir trýst við tíðini, serliga av geopolitiskum spenningum. Eftir russisku innrásina í Ukraina gjørdi Norðurlendska ráðharraráðið av at fara undir eitt nýtt og týdningarmikið arbeiði fyri samfelagsligari trygd og tilbúgving í Norðurlondum. Tað fara vit at leggja serligan dent á undir hesum formansskapinum.
Vit fara eisini at leggja serligan dent á okkara fólkaræði, sum ikki kann takast fyri givið. Vit síggja, hvussu falstíðindi seta alsamt meiri dám á tað almenna kjakið og royna at bróta samanhaldið niður heldur enn at styrkja tað.
Kappingarførið í Norðurlondum er grundleggjandi sterkt, men má styrkjast enn meira. Ein støðugt vaksandi fyrisiting forðar feløgum og íverksetarum í at røkka sínum fulla potentiali. Tí hava vit sett í verk eina greining av norðurlendska kappingarførinum og fara at leggja hana fram undir hesum formansskapinum. Vit gleða okkum til at arbeiða við niðurstøðunum og til formansskapin sum heild.
Í Norðurlondum halda vit saman. Og sjáldan hevur samanhald havt so stóran týdning sum nú.
Myndir: By-, Land- og Kirkeministeriet & Amy Hansen
