Ministeriunerit siulequtaat
Nunat Avannarliit piffissaq nutaaq aqqusaarpaat
Ruslandip Ukrainemi peqqarniitsuliorneratigut sorsunneq eqqatsinnut pisimavoq. Tamat oqartussaaqataanerat tunngavigalugu inuiaqatigiinni aaqqissuussaanerput eqqunngitsumik tunngaveqarluni paasisitsiniaanernik akornusersorneqaqattaarpoq, ataatsimoorsinnaassuseqarnerpullu atassuteqaatit atorlugit saassussinikkut misilittarneqaqattaarluni.
Piffissami taama toqqissisimananngitsigisumi, Nunani Avannarlerni ataatsimoornissarput pingaaruteqarluinnarpoq. Nunaavugut nukittuut, inuiaqatigiinni aaqqissuussaanermik asseqanngitsumik katinngatillit, tatigeqatigiinnermik annertuumik aamma qangarsuaaniilli oqaluttuarisaanitsinnik itisuumik sorlaqartumik ilisarnaateqartut. Ataatsimoornerput tamanna, maanna atorfissaqartipparput. Taamaattumik Nunani Avannarlerni Nordisk Ministerrådimi 2026-imi Nunani siulittaasuuffimmut qulequtaavoq: Piffinni allanngorartuni ataqatigiissut.
Nunarsuarmimi allanngorarneq pippat, uagut uninngaannarsinnaanataluunniit uninngaannassanngilagut. Sverigep Finlandillu NATO-mi ilaasortanngornerisigut ilaqutariit nunat avannarliit imminnut suli qaninnerulerput. Nunani Avannarlerni nunat arfineq pingasuusut akimorlugit naleqartitatta inuiaqatigiinnilu atugarissaarnitta illersornissaanut annertuumik suliassaqarpugut.
Tamanna suli qaninnerusumik suleqatigiinnissatsinnik piumasaqaateqarpoq. Inuiaqatigiit pilersuinerullu isumannaallisarneqarnissat, upalungaarsimaneq, killeqarfiit akimorlugit pinerlunniarneq, Nunat Avannarliit unammillersinnaasssusiisa nukittorsarnissaat, nukissiuutinut mingutsitsinngitsunut ikaarsaariartorneq aamma ukiut makku digitalimik atuinermi meeqqat inuusuttullu immikkut illersorneqarnissaat, assersuutitut taasaqarniaannarluni. Savalimmiut, Kalaallit Nunaata aamma Ålandip nunat avannarliit suleqatigiinnerannut tamakkiisumik ilaasortanngorsinnaanerat siunertaralugu, nunat avannarliit tunngaviusumik inatsisaannik, Helsingforsimi isumaqatigiissummik nutarterinissaq sulissutiginiarparput.
Nordisk Ministerrådip ataani suliani assigiinngitsuni Kalaallit Nunaat peqataavoq, kisianni Danmarkip Savalimmiullu Nordisk Ministerrådiani 2026-imi siulittaasoqarfianni peqataanani. Taamaakkaluartoq Kalaallit Nunaata, Helsingforsimi isumaqatigiissutip nutarterneqarnissaa siunertaralugu ataatsimiititaliarsuarmik pilersitsisoqarnissaa tapersersorpaa, tamannalu aalajangiisuussaaq nunani avannarlerni suleqatigiinnermi Kalaallit Nunaata naligiissumik suleqatitut akuerineqarnissaanut.
Nunat Avannarliit qaninnerusumik nunarsuup sinneranut atassuteqartariaqarput. Nunarsuup ilaani politikkikkut ullumikkut piviusuulersut pissutigalugit qangatut pisarnitsitut eqqarsartuaannarsinnaajunnaarlutalu iliuuseqartuaannarsinnaajunnaarpugut. Taamaattumik naleqartitatta assiginik naleqartitaqartunik nunarsuarmi nunanik allanik suleqateqarnerput nukittorsassavarput.
Piffissani nikerartuni, Nunat Avannarliit, nunarsuarmi nangittumik nunarsuup ilaani ataatsimoornerpaajussapput piujuartitsinermillu tunngaveqarnerpaajullutik. Nunat Avannarlernut iluaqutaasumik nunarsuullu sinneranut isumassarsiorfiusumik.
Nunani avannarlerni suleqatigiinnerup ingerlateqqinnissaanut qilanaarpugut.
Assit Statsministeriet & Erla Rajani Ziskasen
