Formáli samstarfsráðherranna
Heimurinn þarf meira á norrænum gildum að halda – ekki minna, því að Norðurlönd hafa af mörgu að miðla. Á formennskuárinu viljum við beita okkur fyrir enn þéttara samstarfi allra norrænu landanna átta og fylkja okkur að baki framtíðarsýn forsætisráðherranna um að Norðurlönd verði samþættasta og sjálfbærasta svæði heims.
Til að koma þessum málum í höfn er brýnt að sinna stefnumarkandi málaflokkum vel og leggja sérstaka áherslu á að efla grasrótarsamstarf norræns borgarasamfélags. Norðurlönd samanstanda umfram allt af íbúunum sem byggja þau.
Norrænu löndin hafa marga snertifleti. Nefna má auðugan menningararf sem dæmi en ekki síður hlutkennd grunnvirki, samfélagsgerð, tungumál, lýðræði og kraftmikil borgarasamfélög. Ekkert af þessu er óhult fyrir sóknaröflum eins og gera má ráð fyrir í duttlungafullri veröld. Allsherjarinnrás Rússa í Úkraínu varð til þess að Norræna ráðherranefndin setti mál eins og samfélagsöryggi og viðbúnað á Norðurlöndum ofarlega á dagskrá. Á því verður engin breyting á formennskuárinu.
Sama á við um lýðræðislegt stjórnarfar sem má ekki taka sem sjálfgefnu. Við förum ekki varhluta af upplýsingaóreiðu í þjóðmálaumræðunni sem miðar að því að grafa undan samstöðu í stað þess að stuðla að traustum tengslum.
Samkeppnishæfni Norðurlanda er í grundvallaratriðum mikil en hana þarf að efla enn frekar. Sífellt flóknara regluverk og skriffinnska kemur í veg fyrir að fyrirtæki og frumkvöðlar njóti sín til fulls. Við höfum því hafið úttekt á norrænni samkeppnishæfni og verða niðurstöður hennar kynntar á formennskutímanum. Verður áhugavert að vinna úr niðurstöðum þeirrar vinnu og takast á við formennskuhlutverkið sem slíkt.
Á Norðurlöndum stöndum við saman. Samheldni hefur sjaldan verið mikilvægari.
Ljósmyndir: By-, Land- og Kirkeministeriet & Amy Hansen
