Markmið 3: Norrænar rannsóknir skulu vera af miklum alþjóðlegum gæðum, tryggja góða vísindaþekkingu og skapa nýja þekkingu á mikilvægum sviðum fyrir Norðurlönd
Norðurlönd skulu einkennast af því að vera öflugt þekkingarsvæði þar sem norrænar rannsóknir eru órjúfanlegur hluti af því að finna lausnir á stórum samfélagsáskorunum, þvert á fagsvið og samstarfsfleti. Rannsóknir verða að hafa norrænt notagildi byggt á sameiginlegum gildum og viðmiðum og skulu tryggja að Norðurlönd búi yfir vísindaþekkingu fyrir framtíðina. Norðurlönd eiga að vera eftirsóknarvert rannsóknarsvæði með góðum skilyrðum til að gera rannsóknir, óháð kyni, aldri og fötlun. Þetta felur meðal annars í sér að jafnt kynjahlutfall sé innan akademíunnar og starfsmöguleikar fyrir ungt rannsóknarfólk.
