Formáli

Norrænu forsætisráðherrarnir samþykktu árið 2019 framtíðarsýn í norrænu samstarfi um að Norðurlöndin verði sjálfbærasta og samþættasta svæði heims 2030. Framtíðarsýnin skiptist á þrjú áherslusvið þar sem markmiðið er að stuðla að grænum, samkeppnishæfum og félagslega sjálfbærum Norðurlöndum. Vinnumarkaðurinn er máttarstólpi norrænna velferðarsamfélaga og gegnir lykilhlutverki við að gera framtíðarsýnina að veruleika.

Framtíðarsýnin kemur til framkvæmda á tímum þar sem Norðurlönd takast á við sameiginlegar áskoranir og tækifæri sem einkenna vinnumarkaði okkar:

Græn umskipti gera kröfur um umbreytingu á norrænum vinnumörkuðum, að skynsamlega verði fjárfest í sjálfbærri framtíð og að Norðurlönd verði áfram leiðandi á sviði grænnar þróunar.
Lýðfræðilegar breytingar kalla á að áfram verði hugað að framboði á vinnuafli til að tryggja aðgengi að hæfu starfsfólki og þannig megi áfram fjármagna velferðarsamfélög landanna.
Ýmis ný tækifæri felast í aukinni stafvæðingu og notkun gervigreindar og nýrrar tækni sem aftur eykur þörf á umskiptum, færniþróun og að hugað sé að vinnuumhverfi. Þetta á við um atvinnurekendur og launafólk en einnig kjarasamningsbundna ramma vinnumarkaðarins sem norræna velferðarlíkanið byggist á.

Á Norðurlöndum höfum við búið við sameiginlegan vinnumarkað í meira en sjötíu ár. Þrátt fyrir að löndin séu ólík þá eigum við í einstöku samstarfi og það eigum við að nýta til að finna bestu og sjálfbærustu lausnirnar á sameiginlegum tækifærum og áskorunum landanna. Þess vegna er verkefni Norrænu ráðherranefndarinnar um vinnumál (MR-A) að beina aðgerðum tengdum vinnumarkaði þangað sem þær gagnast sem flestum íbúum Norðurlanda. Það gerum við með því að fjalla um vinnumarkað, vinnurétt og vinnuumhverfi í löndunum, svæðisbundið og alþjóðlega.

Markmiðið með þessari samstarfsáætlun er að móta stefnu fyrir allt starf og aðgerðir MR-A á árunum 2025-2030. Það er okkar sýn að þannig getum við eflt norrænt samstarfi um almenna þátttöku á vinnumarkaði sem einkennist af heilbrigðu atvinnuumhverfi, góðum starfskjörum og jafnrétti.

Þannig eflum við aðlögunarhæfni og samkeppnisfærni norrænna vinnumarkaða og gerum Norðurlönd fær um að ná markmiðum framtíðarsýnarinnar um að verða sjálfbærasta og samþættasta svæði heims 2030.

Mats Persson, vinnu- og aðlögunarmálaráðherra Svíþjóðar og Karen Ellemann, framkvæmdastjóri Norrænu ráðherranefndarinnar

Mats Persson
vinnumálaráðherra Svíþjóðar

665489ca9dd46_GS underskrift KE 2023_svart.png

Karen Ellemann
framkvæmdastjóri Norrænu ráðherranefndarinnar