MR-SAM ber sérstaka ábyrgð á því að halda á lofti framtíðarsýninni, stefnumarkandi áherslusviðunum þremur og öðrum norrænum málefnum innan landanna og á norrænum vettvangi auk þess að tryggja að vinnunni sé fylgt eftir. MR-SAM leitast við að efla samstarfið með því að leggja sitt af mörkum til að skapa norrænnar lausnir, nýja þekkingu og vettvang fyrir norræna samvinnu.
Norðurlönd verða sífellt sjálfbærari og samþættari. Þó er enn verk að vinna eigi hið metnaðarfulla markmið framtíðarsýnarinnar að nást. Mikil vannýtt tækifæri eru til staðar á Norðurlöndum á sviði samþættingar og hreyfanleika svo hægt sé að starfa, stunda nám, stofna fyrirtæki eða flytja yfir landamæri norrænu landanna. Vinnan við að auka hreyfanleika og ryðja stjórnsýsluhindrunum úr vegi skiptir sérstaklega miklu máli fyrir aukinn hagvöxt, samkeppnishæfi og samstöðu. Þörf er á markvissara norrænu samstarfi á milli viðeigandi aðila svo að þessu markmiði sé náð.
Vinnan snertir mörg málefnasvið og með þverfaglegu samstarfi skapast skilyrði til þess að koma stjórnsýsluhindrunum og hreyfanleika á dagskrá stjórnmálanna. Hjá öðrum fagsviðum, svo sem innan málefna stafvæðingar-, byggðastefnu-, atvinnulífs-, vinnumála-, menntunar og félags- og heilbrigðismála, fer einnig fram þverfaglegt samstarf og unnið er að verkefnum sem ætlað er að skapa skilyrði fyrir aukinn hreyfanleika. Mikilvægt er að innan landanna sé unnið að viðeigandi málefnasviðum út frá norrænu sjónarhorni.
Til þess að auka samþættingu á Norðurlöndum þurfa íbúar þeirra sem vilja vilja búa, starfa eða stunda nám í öðru norrænu landi að hafa aðgang að upplýsingum. Sem dæmi um aðgerðir á því sviði má nefna stuðning Norrænu ráðherranefndarinnar við upplýsingagjöf til íbúa og fyrirtækja, meðal annars í gegnum upplýsingaþjónustur landamærasvæðanna og Info Norden. Þær stuðla að því að íbúar á Norðurlöndum fái upplýsingar þvert á landamæri ásamt leiðbeiningum á sínu eigin máli og á ensku og möguleika á að tilkynna um stjórnsýsluhindranir.
Borgarasamfélagið er grundvallarstoð í grasrót norræns samstarfs. Nánara samstarf norræns borgarasamfélags ýtir undir samþættingu Norðurlanda. Norræna ráðherranefndin styður við borgarasamfélagið á Norðurlöndum, meðal annars með aðgerðum á vegum MR-SAM í tengslum við stuðning við félagasamtök og samstarfsnet.
Þörf er á því að efla stuðning við borgarasamfélagið, til dæmis með auknum tækifærum fyrir félagasamtök til að sækja um styrki vegna norrænnar starfsemi.
Réttindi og sjónarmið barna og ungmenna eru mikilvæg í norrænu samstarfi og MR-SAM tryggir meðal annars fjárveitingar sem sérstaklega eru eyrnamerktar þessu málefnasviði og að börnum og ungu fólki sé veitt tækifæri til þess að hafa áhrif á ákvarðanir sem þau varða.
Eins og stöðu heimsmála er háttað um þessar mundir skiptir sköpum fyrir sjálfbær Norðurlönd að fyrir hendi sé öflugt norrænt samstarf á sviði samfélagsöryggis, þar með talið almannavarna og viðnámsþróttar. Starfið fer fram á ýmsum stigum jafnt innan ramma Norrænu ráðherranefndarinnar sem utan. Samstarfið um að tryggja aðfangaöryggi snertir mörg fagsvið.
Verkefni MR-SAM er að stuðla að skilvirkri upplýsingagjöf og að tekið sé tillit til norrænna sjónarmiða á þessu sviði í ríkisstjórnunum, ásamt því að fylgjast með vinnunni í ráðherranefndunum og á öðrum viðeigandi vettvangi.
Alþjóðlegt samstarf norrænu ráðherranefndarinnar stuðlar einnig að því að gera framtíðarsýnina að veruleika. Í samstarfi við skrifstofu ráðherranefndarinnar í Eystrasaltsríkjunum og aðra samstarfsaðila á grannsvæðum Norðurlanda og í öðrum heimshlutum er unnið að sameiginlegum norrænum aðgerðum og verkefnum sem byggjast á norrænum gildum. Þetta samstarf styrkir rödd Norðurlanda á alþjóðavettvangi.
Þegar Norðurlönd vinna saman og koma fram sem ein heild eykst sýnileki norrænu landanna og slagkraftur þeirra á alþjóðavettvangi. Með því að fjalla um Norðurlönd sem eitt svæði í alþjóðlegum verkefnum þar sem norræn sendiráð vinna með einkageiranum skapast samlegðaráhrif sem auka samkeppnishæfni Norðurlanda til lengri tíma litið.