Markmið 1: Norðurlönd og Eystrasaltsríkin verði leiðandi í innleiðingu stafrænna og grænna umskipta

Aukin notkun gagna og nýrrar tækni er grundvallaratriði til að nýta möguleika stafvæðingar og stuðla að grænum umskiptum. Þekking og vitund um bæði græna og stafræna tækni veitir svæðinu samkeppnisforskot og býður upp á verkfæri til að stuðla að og hraða stafrænum grænum umskiptum innan ESB og víðar, og taka forystuna í að samþætta grænu og stafrænu umskiptin.

En þó svo að þessi tvenn umskipti séu nátengd er þörf á frekari viðleitni til að nýta gögn og stafrænar lausnir til að takast á við áskoranir varðandi sjálfbærni og draga úr loftslags- og umhverfisfótspori upplýsinga- og fjarskiptatækninnar sjálfrar. Til þess að stafræn umskipti geti orðið sannur drifkraftur við innleiðingu grænna umskipta þurfum við einnig að takast á við orkunotkun, losun og rafúrgang frá stafrænum lausnum.

Samstarf um gagnamiðlun, notkun stafrænna lausna og nýtingu nýrrar tækni getur farið fram í samstarfi við aðrar ráðherranefndir (t.d. ráðherranefndirnar um sjálfbæran hagvöxt eða umhverfis- og loftslagsmál) og getur stuðlað að þróun stafrænnar tvíburatækni og tilraunaverkefna sem byggjast á samhæfðum, rekstrarsamhæfðum og samnýtanlegum gögnum sem stuðla að gagnadrifinni ákvarðanatöku: Nýta FAIR-viðmiðin til að auðvelda hagsmunaaðilum að taka upplýstar ákvarðanir og setja ný viðmið um gagnadrifna stjórnun sameiginlegra auðlinda.

Samstarf um græn umskipti upplýsinga- og fjarskiptatækni getur falið í sér að miðla bestu starfsvenjum og reynslu einstakra landa, vinna saman að stöðlum og samræmingu þegar tekist er á við orkunotkun, losun og rafrænan úrgang frá stafrænum lausnum. Miðlun sérfræðiþekkingar, framkvæmd sameiginlegra rannsóknarverkefna og vinna saman að framkvæmd og mati á áhrifum nýsköpunartækni sem hámarkar ferla, dregur úr umhverfisáhrifum og eykur sjálfbærni almennt á Norðurlöndum og Eystrasaltssvæðinu.