Inngangur 

Í samstarfsáætlun MR-DIGITAL er fjallað um pólitískar áherslur og markmið fyrir tímabilið 2025 til 2030.

Framtíðarsýn Norrænu ráðherranefndarinnar er að Norðurlönd verði sjálfbærasta og samþættasta í heimi fyrir árið 2030. Til að sú framtíðarsýn geti orðið að veruleika munu sértækar samstarfsáætlanir fyrir hvert fagsvið stýra starfi allra ráðherranefndanna á árunum 2025–2030 sem byggjast á þremur pólitískum áherslum framtíðarsýnarinnar: græn Norðurlönd, samkeppnishæf Norðurlönd og félagslega sjálfbær Norðurlönd.

Samstarfið um stafvæðingu í MR-DIGITAL nær ekki aðeins til Norðurlanda heldur einnig Eystrasaltsríkjanna. Samfélög okkar byggja á lýðræði, jafnrétti, mannauði og samfélagslegri ábyrgð. Við verðum að tryggja að stafræn umbreyting fylgi þessum meginreglum nú og í framtíðinni. Stafvæðing og tækninýjungar eru stórir drifkraftar í þróun bæði einkageirans og hins opinbera sem og lykilþáttur í grænum umskiptum. Norðurlönd og Eystrasaltsríkin eru eitt þeirra svæða sem lengst hafa komist í stafvæðingu á heimsvísu og eru því í einstakri stöðu til að leiða stafræna þróun – svæðisbundið og á alþjóðavettvangi. Samstarf Norðurlanda og Eystrasaltsríkjanna innan MR-DIGITAL einkennist af sameiginlegum tækifærum og áskorunum, við að búa í haginn fyrir inngildandi og örugg stafræn umskipti, efla samkeppnishæfni og grænan hagvöxt auk þess að auka frjálsa för og samþættingu á svæðinu með öruggri og skilvirkri stafrænni þjónustu yfir landamæri fyrir fólk, fyrirtæki og yfirvöld.

Norðurlandaráð, borgarasamfélagið, atvinnulíf og aðrir hagsmunaaðilar hafa tekið þátt í þróun þessarar samstarfsáætlunar. Áætlunin var samþykkt af Norrænu ráðherranefndinni um stafvæðingu hinn 20. september 2024 og gildir hún frá 1. janúar 2025 til 31. desember 2030.

Stafræn þróun er þverfagleg í eðli sínu. Til að markmið þessarar samstarfsáætlunar geti orðið að veruleika er þörf á þverfaglegu samstarfi. Með samstarfi við önnur fagsvið í norræna samstarfinu, svo sem svið umhverfis- og loftslagsmála, hagvaxtar, orkumála, heilbrigðismála, menntunar og rannsókna, náttúruauðlinda, menningar og stjórnsýsluhindrana má tryggja að hægt verði að finna samlegðaráhrif og takast á við sameiginleg verkefni og um leið ná fram sem umfangsmestum áhrifum sem felast í því að gera metnaðarfull markmið framtíðarsýnarinnar 2030 að veruleika.

Öll starfsemi Norrænu ráðherranefndarinnar á að stuðla að því að gera að veruleika framtíðarsýn okkar um að Norðurlöndin verði sjálfbærasta og samþættasta svæði heims árið 2030. Samstarfsáætlunin lýsir því hvernig fagsviðið ætlar að vinna með stefnumarkandi áherslurnar þrjár.