Stjórnsýsluhindranahópurinn

Til að ná markmiðum Norðurlandaráðs varðandi frjálsa för hefur Norðurlandaráð stofnað stjórnsýsluhindranahópinn, sem er starfshópur skipaður þingmönnum í Norðurlandaráði sem vilja beita sér fyrir hreyfanleika og frjálsri för á Norðurlöndum. Í hópnum eru fulltrúar úr forsætisnefnd og öllum fagnefndum Norðurlandaráðs, sem skapar tengingu milli hópsins og hins venjubundna pólitíska starfs ráðsins.

Á vettvangi Norðurlandaráðs eru þeir fulltrúar hinna 27 milljóna íbúa á Norðurlöndum sem þjóðkjörnir þingmenn, hver á sínu þjóðþingi. Þingmennirnir eiga að leggja sig fram um það, hver í sínu landi, að knýja á um aukinn hreyfanleika á Norðurlöndum. Markmiðið er að öll löndin, landamærasvæðin og flokkahóparnir eigi sér fulltrúa í hópnum.

Stjórnsýsluhindranahópurinn er mikilvægasta verkfæri Norðurlandaráðs í starfinu að afnámi stjórnsýsluhindrana. Starfið að afnámi stjórnsýsluhindrana er drifið áfram af bæði hópum og einstaklingum. Meðlimir hópsins bera einnig sérstaka ábyrgð á því að stuðningur sé við málefni tengd stjórnsýsluhindrunum í fagnefndum Norðurlandaráðs og forsætisnefndinni.

Stjórnsýsluhindranahópurinn er ekki hefðbundinn pólitískur hópur – hann gegnir hlutverki brúarsmiðs, varðhunds og þrýstiafls. Stjórnsýsluhindranahópurinn leitast við að:

Hlusta og framkvæma - Meðlimir hópsins leitast við að vera í tengslum við raunveruleikann og skilja þær áskoranir sem einstaklingar og fyrirtæki mæta í daglegu lífi.
Knýja fram lausnir - Meðlimirnir mega athafna sig að vild. Þeir knýja fram breytingar og tryggja að lausnir séu ræddar á viðeigandi vettvangi og því næst framkvæmdar.
Skapa norrænan virðisauka - Þingmennirnir eru meira en fulltrúar heimalanda sinna – þeir tileinka sér norrænt sjónarhorn svo að lausnirnar takmarkist ekki af landamærum.

Hópurinn stuðlar að því með starfsemi sinni að jafnvægi skapist milli þeirra landsbundnu og norrænu markmiða sem hver ríkisstjórn hefur sett sér.

Framkvæmdaáætlun

Með útgangspunkt í hinum sjö marksviðum er tekin ákvörðun um árlega framkvæmdaáætlun Stjórnsýsluhindranahópsins, sem markar stefnu fyrir starf hans. Í þessari áætlun er eftirfarandi skilgreint:

Markmið: Þau langtímaáhrif sem við viljum ná fram.
Hagsmunaaðilar: Þeir aðilar sem verða að taka þátt til að markmiðin geti náðst.
Meginstarfsemi: Lykilverkefni sem stuðla að því að afnema hindranir og efla samþættingu á Norðurlöndum.
Vísar: Mælanleg merki þess að við stefnum í rétta átt.

Samskiptaáætlun

Til að tryggja stuðning við starfið hefur verið gerð markviss samskiptastefna sem spannar bæði heildarskilaboð og sértæka starfsemi:

Heildarskilaboð – Fyrir hvert marksvið eru skilgreind skýr meginskilaboð sem útlista ástæður þess að þetta svið skipti máli fyrir íbúa og fyrirtæki á Norðurlöndum.
Skilaboð fyrir tiltekin verkefni – Fyrir hvert og eitt verkefni eru samin sérstök skilaboð sem styðja við framkvæmd verkefnis og kveikja áhuga hjá viðeigandi hagsmunaaðilum.
Boðleiðir upplýsinga – Við notumst við samskiptaleiðir Norðurlandaráðs en eigum einnig í samstarfi, þegar við á, við svæðisbundnu upplýsingaskrifstof-urnar til að tryggja að upplýsingar um réttindi og lausnir nái til þeirra íbúa og fyrirtækja sem verða fyrir áhrifum af þeim.
Samskipti með hliðsjón af markhópi – Við vinnum markvisst að því að vekja athygli á úrlausnarefnum svo að upplýsingar um þau nái til ráðamanna og annarra sem geta stuðlað að breytingum.

Samskiptamál eru skipulögð í samræmi við almenna upplýsinga- og samskiptastefnu Norðurlandaráðs.

Skýrslugjöf og eftirfylgni

Stefnan skapar ramma fyrir kerfisbundnar og samhæfðar aðgerðir, en árangur af henni er háður stöðugu mati og aðlögun. Með því að skrásetja starfsemi okkar tryggjum við samfellu í starfinu, einnig þegar stjórnmálamönnum er skipt út.

Stjórnsýsluhindranahópurinn gerir jafnóðum grein fyrir árangri og niðurstöðum á fundum sínum og á fundum forsætisnefndar og fagnefnda Norðurlandaráðs.