MENU
Við erum mjög ánægð með að þú skulir hafa opnað þetta rit þar sem þú getur fræðst um allt sem þú þarft að vita um öflugasta samstarf á Norðurlöndum:
Hér færðu meiri upplýsingar um okkur!
Norræna ráðherranefndin hefur verið til síðan 1971 en hún hjálpar norrænu löndunum að vinna saman. Norrænu ríkin eru Ísland, Noregur, Danmörk, Svíþjóð og Finnland en svæðin Grænland, Færeyjar og Álandseyjar eru líka með í Norrænu ráðherranefndinni.
Norræna ráðherranefndin er samt ekki bara ein nefnd. Alls vinna 12 ráðherranefndir að mismunandi málefnum. Í nefndunum hittast ráðherrar frá norrænu löndunum og ræða um sín málefnasvið. Til dæmis hittast loftslags- og umhverfisráðherrar og ræða um loftslagsmál og umhverfismál. Það sama á við um menntamál, heilbrigðismál og margt fleira.
Norðurlandaríkin fimm skiptast á að stýra starfinu í Norrænu ráðherranefndinni. Þau stýra því eitt ár í einu. Þannig skiptast löndin á að ráða því hvað Norræna ráðherranefndin leggur sérstaka áherslu á.
Norðurlöndin eiga margt sameiginlegt. Við höfum líka átt í mjög nánu sambandi gegnum tíðina. Tungumálin sem töluð eru í sumum löndunum eru mjög lík. Þetta á sérstaklega við um dönsku, sænsku og norsku. Þá er líf okkar frá degi til dags mjög svipað. Við höfum líka byggt skólana okkar og vinnudaginn upp á mjög svipaðan hátt.
Við lítum líka sömu augum á lýðræðið og höfum sömu hugmyndir um hvernig þau sem ráða eiga að koma fram við almenning. Á öllum Norðurlöndunum eru mörg félög og samtök sem allt fólk getur verið aðilar að. Þannig fær fólk tækifæri til þess að hafa áhrif á þær ákvarðanir sem stjórnmálafólkið tekur. Norræna ráðherranefndin vinnur mjög mikið með alls konar félögum og samtökum.
Og af því að löndin eiga svona margt sameiginlegt þá er auðveldara fyrir þau að vinna saman.
Ráðherrarnir ákveða saman hvaða málefnum ráðherranefndin á að vinna að. Þegar ráðherrarnir hittast, ræða þeir saman og taka ákvarðanir um hvað eigi að gera á þeirra málefnasviði í Norrænu ráðherranefndinni. Ráðherrarnir verða að vera sammála þegar þeir taka ákvarðanir. Þeir ákveða líka í hvaða verkefni á að nota peninga.
Þá er Norræna ráðherranefndin með skrifstofu. Þar vinnur fólk frá öllum Norðurlöndunum og þar er töluð ýmist sænska, norska eða danska. Á skrifstofunni eru þau verkefni unnin sem ráðherrarnir ákveða að eigi að vinna. Á skrifstofunni er framkvæmdastjóri sem stjórnar daglegum störfum Norrænu ráðherranefndarinnar. Samt eru það ráðherrarnir og þess vegna allar ríkisstjórnirnar á Norðurlöndum sem ákveða hvaða verkefni á að vinna.
Vinna Norrænu ráðherranefndarinnar snýst ekki síst um að leiða saman fólk frá norrænu löndunum. Þess vegna hjálpar Norræna ráðherranefndin fólki frá Norðurlöndunum að vinna saman. Til dæmis geta samtök sem vinna að réttindum barna og ungmenna fengið peninga til þess að halda fund með þátttakendum frá öllum Norðurlöndunum. Norræna ráðherranefndin gefur fólki peninga sem vinnur við að búa til bíómyndir, bækur eða bæklinga um einhver málefni.
Þau sem vinna á skrifstofu Norrænu ráðherranefndarinnar safna saman rannsóknum og þekkingu um alls konar málefni. Þá getur stjórnmálafólk í ríkisstjórnum og á þingum landanna nýtt þessa þekkingu í stefnumótun sína. Til dæmis hefur Norræna ráðherranefndin ákveðið hvernig leiðbeiningar um mataræði eiga að vera en þessar leiðbeiningar eru nú notaðar á öllum Norðurlöndunum, meðal annars í skólum.
Svo heldur Norræna ráðherranefndin sjálf stóra fundi, meðal annars fundi þar sem börn fá tækifæri til þess að segja stjórnmálafólki frá skoðunum sínum á ýmsum málum.
Á Norðurlöndum höfum við sérstaklega mikið gagn af því að skiptast á þekkingu af því að Norðurlöndin eru svo lík hvert öðru. Ef eitthvað gengur til dæmis mjög vel í Svíþjóð er líklegt að það geti líka gengið vel í öðru norrænu landi.
Samstarfið gerir okkur líka sterkari. Norrænu löndin eru öll lítil. Þess vegna skiptir máli að standa saman ef við viljum láta rödd okkar heyrast í heiminum. Þannig verða áhrif okkar meiri meðal stóru landanna í heiminum.
Norðurlöndin vinna til dæmis oft saman innan Sameinuðu þjóðanna. Þar verðum við sterkari þegar við stöndum saman þannig að við náum að hafa áhrif á önnur lönd. Þetta getur til dæmis verið á sviði barna- og unglingamála, loftslagsmála og umhverfismála.
Þau norrænu ríki sem eru aðilar að ESB vinna líka mjög mikið saman þar.
Meðal mikilvægustu markmiða Norrænu ráðherranefndarinnar er að börnum og ungmennum á Norðurlöndum líði vel.
Þess vegna vinnum við að því að á öllum þeim sviðum sem ráðherranefndin vinnur með sé hugað vandlega að því hvernig áhrif starfið hefur á börn og ungmenni og hvernig börn og ungmenni geti haft áhrif.
Við vinnum náið með þeim samtökum sem eru málsvarar barna og ungmenna á öllum Norðurlöndunum. Við vinnum að því að hlustað sé á unga fólkið og að það taki þátt þegar stjórnmálafólkið í löndunum tekur ákvarðanir.
Við viljum að nemendur í skólum hitti nemendur á hinum Norðurlöndunum. Við búum til sameiginleg verkefni um norrænu tungumálin fyrir börn. Við styðjum verkefni þar sem börn og ungmenni frá öllum Norðurlöndunum geta barist fyrir því sem þeim finnst mikilvægt. Norræna ráðherranefndin vill að börn og ungmenni taki enn meiri þátt í starfinu en nú er. Þú getur alltaf náð sambandi við Norrænu ráðherranefndina ef þú ert með hugmynd að verkefni þar sem börn og ungmenni á Norðurlöndunum gera eitthvað saman.
Sendu hugmyndina þína á netfangið nmr@norden.org
Í matvöruversluninni
Þú hittir Norrænu ráðherranefndina þegar þú kaupir inn. Norræna ráðherranefndin stendur nefnilega að Svansmerkinu sem er eitt af fyrstu umhverfismerkjunum. Það er merki sem vörur fá ef þær uppfylla ákveðin skilyrði um hollustu og umhverfismál.
Við landamæri
Ef þú ferðast um Norðurlöndin sérðu greinilega að samstarf landanna er mikið í Norrænu ráðherranefndinni. Norðurlöndin eru nefnilega eitt svæði. Ef þú átt heima í einu af norrænu löndunum geturðu farið milli þeirra allra án þess að sýna vegabréfið þitt. Stundum er samt eftirlit við landamærin í sérstökum tilvikum. Það gerðist til dæmis árið 2020 þegar kórónuveiran kom til Evrópu og margir veiktust, líka á Norðurlöndum. Yfirleitt kemst fólk samt yfir landamærin milli landanna án þess að nokkur stöðvi ferð þess. Það er líka auðvelt að vinna eða fara í nám í einhverju af hinum löndunum.
Í bókahillunni
Norræna ráðherranefndin veitir peningum til þess að þýða margar barna- og unglingabækur sem koma út á Norðurlöndunum þannig að þær komi líka út í hinum löndunum á þeim tungumálum sem eru töluð þar. Þetta gerum við til þess að styðja norræna samkennd gegnum bækur.
Lög og réttur: Til þess að auðvelda samstarf Norðurlandanna enn meira skiptir máli að lög og reglur landanna líkist. Það er liður í því að tengja Norðurlöndin enn betur saman.
Vinnumál: Á Norðurlöndunum á að vera gott að fara í vinnuna. Enginn má verða veikur eða útkeyrður vegna vinnu sinnar. Þá á að vera auðvelt að fá fólk til að vinna í fyrirtækinu sínu, óháð því hvar á Norðurlöndum það fólk á heima. Þess vegna vinna norrænu löndin mjög mikið saman í tengslum við reglur á vinnumarkaði.
Umhverfis- og loftslagsmál: Norrænu löndin vilja öll standa framarlega þegar kemur að umhverfismálum og loftslagsmálum. Í öllum löndunum er mikið gert til þess að verða bæði loftslagsvænni og sjálfbærari en við getum alltaf gert betur. Á þessu sviði geta Norðurlöndin saman haft meiri áhrif á önnur lönd í heiminum, til þess að þau passi líka betur upp á jörðina.
Börn og ungmenni: Norðurlönd eiga að vera besti staður í heimi fyrir börn og ungmenni. Þetta þýðir að börnum og ungmennum líður vel og að þau vita að þau eiga rétt á því að hlustað sé á þau. Þau eiga líka að hafa tækifæri til þess að hafa áhrif á ákvarðanir sem snúast um þau.
Menning: Listir og menning eru mikilvægur liður í samkennd á Norðurlöndum. Gildin sem við eigum sameiginleg birtast nefnilega í listum og menningu sem verður til á Norðurlöndum.
Menntamál og rannsóknir:
Norræna ráðherranefndin vinnur líka að því að til sé gott samfélag um menntun og rannsóknir á Norðurlöndum. Það á að gagnast börnum, ungmennum og fullorðnu fólki.
Jafnrétti: Á Norðurlöndum á allt fólk að fá sömu tækifæri, óháð kyni. Jafnrétti þýðir að karlar og konur hafi sömu tækifæri og að ekki eigi sér stað mismunun. Norrænu löndin hafa unnið saman að jafnrétti í meira en 40 ár.
Tungumál: Það er mikilvægt að við höldum áfram að reyna að skilja hvert annað og tungumálin sem við eigum sameiginleg á Norðurlöndum. Þetta á sérstaklega við um dönsku, norsku og sænsku. Ef við þekkjum tungumál hvert annars verður auðveldara að ferðast, mennta sig og vinna í öðru norrænu landi.
Ráðherra: Sá eða sú sem ber ábyrgð á tilteknum málaflokki í ríkisstjórn lands. Umhverfisráðherra ber til dæmis ábyrgð á því sem snýr að umhverfismálum, mengun og náttúru.
Lýðræði: Þegar allir íbúar lands ráða því hver eigi að stjórna landinu. Þetta þýðir að þau sem eru orðin 18 ára mega greiða atkvæði í kosningum og að við eigum öll rétt á að segja skoðun okkar.
Stjórnmálafólk: Fólk sem er kosið til þess að taka ákvarðanir. Það getur verið í borgarstjórn, bæjarstjórn eða sveitarstjórn sveitarfélags eða á þingi landsins. Þingið á Íslandi nefnist Alþingi.
Samtök: Þegar margt fólk tekur sig saman til þess að gera eitthvað saman eða af því að það er sammála um að tiltekið málefni sé mikilvægt er oft talað um samtök. Til eru margs konar samtök. Rauði krossinn, Blindrafélagið og Knattspyrnusamband Íslands eru nokkur þeirra samtaka sem eru til á Íslandi.
Rannsóknir: Það kallast rannsóknir þegar sérfræðingar rannsaka eitthvað mjög vel til þess að komast að einhverju nýju.
Þekking: Það sem við vitum um alls konar hluti í lífi okkar og í heiminum. Þegar við komumst að einhverju nýju, til dæmis gegnum rannsóknir, er sagt að ný þekking verði til.
Ríkisstjórn: Æðsta stjórn lands. Forsætisráðherrann stýrir ríkisstjórninni.
Stefnumótun: Áætlanir eða markmið sem verða til hjá stjórnmálafólki um hvernig það eigi að vera að búa í landi eða hvernig hlutirnir eiga að breytast.
Sameinuðu þjóðirnar: Stundum skammstafað SÞ. Sameinuðu þjóðirnar eru samtök allra ríkja heims. Þar koma löndin saman og ræða vandamál heimsins og hvernig hægt sé að leysa þau.
ESB: Stendur fyrir Evrópusambandið. ESB er samstarf milli 27 landa í Evrópu þar sem búnar eru til sameiginlegar reglur og markmið um málefni eins og heilsu, loftslag og margt fleira. Svíþjóð, Danmörk og Finnland eru aðilar að ESB.
Nord 2021:019
ISBN 978-92-893-6964-0 (TRYCK)
ISBN 978-92-893-6965-7 (PDF)
ISBN 978-92-893-6966-4 (ONLINE)
http://doi.org/10.6027/nord2021-019
Útgefið 8.7.2021
Uppfært 31.8.2021
© Norræna ráðherranefndin 2021
Höfundur: Turi Kjestine Meyhoff
Ráðgjöf: Amalie, 11 ára - Alfred, 11 ára - Minna, 10 ára - Emma, 10 ára - Billie, 11 ára
Myndskreyting: Knud Andersen
Umbrot: Louise Jeppesen
Prentun: Rosendahls
Norrænt samstarf
Norræna samstarfið er eitt umfangsmesta svæðissamstarf í heimi. Samstarfið byggist á legu landanna, sameiginlegri sögu þeirra og menningu. Að samstarfinu koma Danmörk, Finnland, Ísland, Noregur og Svíþjóð auk Álandseyja, Færeyja og Grænlands.
Norræna samstarfið er pólitískt, efnahagslegt og menningarlegt og lætur muna um sig í evrópsku og alþjóðlegu samstarfi. Löndin stuðla sameiginlega að öflugum Norðurlöndum
í öflugri Evrópu.
Með norrænu samstarfi er hagsmuna svæðisins gætt og norræn gildi efld í hnattrænu
samhengi. Sameiginleg gildi landanna styrkja stöðu Norðurlanda og skipa þeim meðal
þeirra svæða í heiminum þar sem nýsköpun og samkeppnishæfni er mest.
Norræna ráðherranefndin
Nordens Hus
Ved Stranden 18
DK-1061 Kaupmannahöfn
www.norden.org
Lesa fleiri norræn rit: www.norden.org/is/utgafur